<body><script type="text/javascript"> function setAttributeOnload(object, attribute, val) { if(window.addEventListener) { window.addEventListener('load', function(){ object[attribute] = val; }, false); } else { window.attachEvent('onload', function(){ object[attribute] = val; }); } } </script> <div id="navbar-iframe-container"></div> <script type="text/javascript" src="https://apis.google.com/js/plusone.js"></script> <script type="text/javascript"> gapi.load("gapi.iframes:gapi.iframes.style.bubble", function() { if (gapi.iframes && gapi.iframes.getContext) { gapi.iframes.getContext().openChild({ url: 'https://www.blogger.com/navbar.g?targetBlogID\x3d10102793\x26blogName\x3dBeauty+in+the+Beast\x26publishMode\x3dPUBLISH_MODE_BLOGSPOT\x26navbarType\x3dBLUE\x26layoutType\x3dCLASSIC\x26searchRoot\x3dhttp://beautyinthebeast.blogspot.com/search\x26blogLocale\x3den_US\x26v\x3d2\x26homepageUrl\x3dhttp://beautyinthebeast.blogspot.com/\x26vt\x3d1533325655046733383', where: document.getElementById("navbar-iframe-container"), id: "navbar-iframe" }); } }); </script>
Beauty in the Beast
1/30/2005
軟綿綿啊
好濕好濕,9X% 濕度令美人的鼻子十分唔聽話,真係想打佢 pat pat,咁即係要星自己幾巴,無咁蠢啊~ 所以最尾都無打到,由得個鼻係度流下水發足癲。一早番工之後跳舞跳到四點先第一啖有野入口,食咩呢食咩好呢?一隻人入左間超級平民化的架仔野食一碗拉麵 + 青瓜/ 中華沙拉壽屍,好美味都仲係三十蚊有找,飽得眼閉。一路食一路好似喊咁流鼻水沫鼻水,唔知仲以為我新年流流失戀一個人,暴食兼觸景生情,皆因隔離對情侶癡纏無比,你食唔食粟米架?唔食呀?比我食啦,咁咪唔 sigh 囉~~ 開始越來越知道自己鐘意邊類型男人,比起以前只知道討厭邊款來得實在及有個根據大方向。溫柔如清甜旦糕的男人確能好好整治美人,多次聽到溫柔男人們說話都即時有觸電之感,男人溫柔實有玩冰火之感,如果你明我講乜既話 ;p


 
1/27/2005
我是真的真的真的很愛你
慈悲為懷的尊貴老母大人問候美人:『乜你讀書個時比人洽得好緊要架?』事關佢事又臭巧識到我母校的一位老師,雖然佢無教過我,但美人這種登登登「木凳」的大人物又會有邊個唔識?讀書個時既美人已經開始愛表演愛出風頭,活得咁高自然有人好乜支持崇拜你,亦會有人憎你憎到恨不得天天搵屎淋你。從前跟現在的我真的不一樣,以前欠了現在的堅強幽默瀟洒及朋友。一日喊幾次實屬飲水食飯。喊都要死入洗手間喊,行出泥要扮無野,繼續嘻嘻哈哈,因為 D 賤人見到我喊,佢一定開心死。唔止同學,老師都會串我,其實我只係一個乖乖學生 + 非常愛上台表演,只有係台上先搵到尊嚴同自信,掌聲將我虛空的友濟生活填滿。掌聲歸掌聲,沒有朋友的支持及分享始終差好遠,何況賤人們更會特登同我做朋友,然後就圍將我的事講出去跟住恥笑,初中的生活就係咁上下。
高中至大學到現在已學會自愛堅強,有人更說我自大自私自把自為,甚至對著情人都有點怕、不懂如何打開晒個心交往,從新一次學習孩童接受父母的愛般,接受別人的愛。這個「別人」將會是由珍貴朋友伸延到可愛愛人。
下一個情人,請你聽清楚:「我只會因為愛你才跟你一起,我會勇敢打開心房接受你的愛,聽來奇怪,但我真的不懂,在過去我作出了自我中心的選擇,有了你之後我會試著全然的跟你相處,如果你有幸看到這篇宣言,記得溫柔提醒我,謝謝你的關顧,與及無償的愛護。」

 
1/24/2005
那些青澀的
一天下午,表哥跟我在家裡閒著等媽媽,表哥想到街上打羽毛球,我也很喜歡打羽毛球,於是我們到處找球拍和沒有太爛的球,卻突然下起大雨來,表哥說:『媽媽叮囑我下雨時要帶傘子,濕透身子很易著涼。』我的媽媽都跟我說過同樣的,我倒想做相反的看看,於是倆個傻人走在雨中打羽毛球,邊打邊笑得哈哈叫,街上的人匆匆走過,我們則在雨中享受雨點大大力打在身上的痛楚,迫生又親切,衣服頭髮肌膚都濕透,然後我跳起自由舞來,我很胖卻愛動得很,表哥指著我笑得更厲害,這就是狂歡快樂。之後我們得了大傷風,躺在房裡兩星期多,沒有人知道我們為何突然病倒,更沒有人知道戀愛偷偷在雨中發芽。


 
1/21/2005
咳咳咳.....都唔生性 o既!
上網 d/l mp3 個隻 program 大人凸然唔 work,唔 Q 知點解?!無新歌聽,實在有 D '唔制啊'的感覺。作為一隻餐搵餐餐勁食無乜錢剩的猩豆市民,翻板/ 非法下載實在沒有打倒 o既必要,正如由旺角入屯門的泥 mount 的及晨早由郊區出市區 o既神聖穿巴,當然正過靚到飛起又貴到無人撘 o既西鐵。Official/ legal 野永遠都無番皂野咁刺激和對胃,正室點夠二奶咁風騷入骨,七情上面,怒扭纖腰咁叫你老公飲碗湯呢?新鮮感係次要,最緊要係閣下有幾賣力去關心下條友,佢一番到泥你就叫佢做呢樣做個樣,豈問佢又點會開心愉快?責任心係自發物,迫唔出泥架 bor,『你估你出去做野就大晒呀?頭家你無份架?番到泥乜都唔做就,做死我啦!』邊個聽完會回心轉意呢?會個條友真正白痴啦!我知你會有仆心仆命為頭家,你都鬧到氣咳,但你老公就係 feel 唔到囉,咁勞噪有咩用呀,死婆!溫柔 D 佢講句野會死架?使唔使下下都粗聲粗氣大有冤情咁款先?反醒下啦!妖!
 
1/18/2005
食啦喂!
腸粉好好味。簡單白色捲埋的粉皮,加上少少甜醬豉油、多多麻漿及芝麻 ( 美人唔要辣醬架喎 ),包係將紙裡面,盛惠五蚊,已經好幸福滿足。個日行運 o既話,會見到『高級腸粉』,此乃即叫即蒸個種,師父仲會問你要咩料,蔥花蝦米牛肉叉燒油炸鬼任君選擇,最愛的是齋蔥花,清新鮮嫩,放縱一點會叫炸兩,不過為保皮膚白哲,都係食少 D 炸野好。之後師父用布沾滿米水,放係蒸爐,襟蓋,不消一刻,腸粉皮跟布分開,然後被捲埋,再問:『要咩醬呢?』帝皇式享受,通常『高級腸粉』只有甜辣二醬,我只會要豉油加爆多芝麻,唔要甜醬旨在嘗其鮮味。熱辣辣,咪講笑,好食過壽屍多多聲。

新鮮出爐熱辣辣 o既麵包又係殺得死人,豬仔包就可以啦,有餡個 D 喧賓奪主,襟晒 D 麵包味,死開!要食好麵包,連鎖貴價個 D 仲未夠班,好吃包包只會出現係裝修殘舊,價錢平到飛起個 D 鋪頭,元朗有大把,無大多牛油味,剛好在軟綿綿及好 Q 之間,meet 開有縷縷輕煙,微微暖暖的手/ 口感,一真深達腸胃,正呀!口痕痕會想食江蘇餅麼囉蘇,此乃中式糕餅中較為不甜的一類,由於驚肥,甚為少食,一有機會食就開心笑到仆晒街,幾件野夾埋先五六蚊,就係抵到爛,旺角有兩間都好得,愛包之仕一定知訂。

縱使非常喜歡食,有幾野樣食美人就十分麻麻地,

朱古力 ( 完全唔覺得好食,無 obsession,不能為我帶來高潮/愛情感覺 )、雞翼 ( 啊!得罪晒!)、牛肉(貪靚囉!)、雪糕 (之前至愛,健康理由戎晒生冷野,有好幾年無食過囉)、生蠔魚生(生食人地 D 肉,有無再核凸恐佈 D 呀?!)、cheesecake (真係好能難食,爛 bad bad仲有芝屎味,yeeeeee yuck!)、所有內臟 (硬係凝住有屎係裡面架.......)都係咁上下,唔唔......寫寫下都覺得自己食野幾厭尖。噢!

 
1/17/2005
一世也初戀
美人中學都學王昭君大姐咁彈一手琵琶,學過樂器 o既人都知要將一首歌演奏得好,日練夜練乃係唯一及最好的方法。猶記得當年每日都要先練一粒鐘基本功,就係不斷咁彈一大渣音符,旨在訓練手指靈活度、力度及拍子,最重要就係手心合一,唔好唔記得手有兩隻,要分別做唔同 o既野,只要偷懶扮忙練少一兩日,指揮都會聽得出,其實自己都會知,個琴一放上手生硬左,個心都會實晒。對於我呢種 ' When I feel like doing it, I will do it now' 學樂器簡直係莫大挑戰,耐性毅力加不離不棄,唔練功一日就退化,事實勝於一切癈話,對於唔識音樂 o既都仲可以扮下野過骨,門內漢一野就睇穿,咁我呢種好勝心強又死要面 o既就自自然會日日乖乖練琴。這樣令我想起《 50 first dates》,如你我能這樣戀愛,實是美不勝收。
*************************************************************

肥豬遇上香港人問:『你點解要減肥?你比我細少纖瘦好多喎!』

香港人答:『你唔明架啦!我肥係 D 你見唔到 o架地方,況且你係豬,越肥越多人讚,你點可以將我同你比呢?』

咁又係。



 
1/14/2005
如果有朝一日,你我還在這兒......
盪氣迴場的愛情故事大多是主角最後多是陰陽相隔,〈 Moulin Rouge〉、〈Titanic〉、〈藍宇〉都是這樣恨恨地把兩個人一刀斬開,想想雙生兒 ( 不是阿 Sa 和阿嬌姐 ) 血肉相連,然後硬要被刀從中間切開,想一想都痛到尖叫,然後整個人的半邊身都流血,痛到無力包托,只好讓血淡淡流乾,傷口慢慢細細復原,或許無法復原,只好一生一世帶著這副驅體過活。身體故然痛到仆街,腦裡想的又是什麼?是不是你的一句「我永遠都要跟你在一起」?美人實在認識一些朋友的伴侶因意外疾病仙遊,朋友談起已過身的他或她,一定會想起那一個句『永遠』,不是永遠麼?你現在又到了那裡去?你講大話,你丟下我不理了,我不知手執那一把刀斬開我們的是誰,我只好微微怪罪於你,但我其實又怎捨得怪你呢!

曾經跟第一個他談『永遠』,當時他都認同,然後這些只持續了一個月,然後呢?上一個仲夏,我跟另一個他說『永遠』,他說我跟另一個他正在邁向『永遠』,聽說這只容得下倆個人,於是我只好放棄我的『永遠』。原來我的『永遠』只不過是一兩個月的事情,沒有什麼了不起,那我以後拿什麼跟別人去洽談呢?於是我不說將來,只要現在,你理得我之後孤身走我路,無限虛空墜千丈。一片海水就不知把幾多帶走,所以我只要現在,就是永遠的現在好了。

 
1/13/2005
美人不美誰算美
美麗發自內心是屁話。白癡才信,撫心自問,美人一出世就 5'11" 但 36-24-36,肌膚吹彈可破,然後食泥食去都係肥個胸同籮,條腰手腳同塊臉都係咁瘦,吹咩等各路班仆街睇到眼凸凸兼含恨而終,點樣電負離子 & 做尖修身都同我差幾億隻馬脾。然後男人愛上我卻跟其他人說:「我愛美人並非為其美貌,我愛的是其內在與我能互相交流......」體液就交流!妖!心知癈話連篇還是由得他們胡說百道,噢~~~~ 真係天忌紅顏!美人胸襟猶如太平西洋,我都費事同你噪!我噪!

奈何世事難料,期望越大,失望最大,由高處幻想位偷睇自己,原來自己跟野獸根本長得沒兩樣,這樣的絕色美人竟活在一副雞飛狗跑的野獸驅體內,當中的血淚辛酸實在不知從何說起!反過來卻見我心不死上進勤奮,力求完美及豐富的創造力,這樣的美人更見崇高可貴,深得泥民百性愛戴,寵愛萬千,受賞田地千萬畝,實在無以為報,日後只好繼續惠心寫作,以報賤民們的支持,觀賞男人長精萬里之心,歌頌女人此無無恥之心,有幸閱畢這篇舉世佳作,汝跟美人定必緣定三生,係度順便恭祝百業暢旺,乜都蒸蒸日上,恭喜!恭喜!

 
Our past......
January 2005
February 2005
March 2005
April 2005
May 2005
June 2005
July 2005
August 2005
September 2005
October 2005
November 2005
December 2005
January 2006
February 2006
April 2006


Now you tell me......

- host